Die Grie Soß – Saison ist eingeläutet – hier gibt es ein Rezept „uff hessisch“:

Frankforder Grie Soß

Grie Soß kimmt heut uff unsern Tisch
mit siwwe Kräuder, all ganz frisch.
Borretsch, Schniddlauch sinn debei,
Pimbinell kimmt aach enei,
eweso e Porzjon Kresse.
Saueramfer net vergesse!
Dann noch Kerwel, Pedersillje:
E Festmahl fer die ganz Famillje.
Des Griezeusch is ja net so deier.
Als neeschsdes, hadd gekocht, zwaa Eier,
en Leffel Eel, en Leffel Essisch
– so schbrischt mer des korreggt uff hessisch –
e bissi Jogurt, sauer Sahne,
sieße Sahne brauch mer kaane.
Jetz rasch die Kräuder feigehackt,
in e groß Schissel neigepackt,
un Salz un Peffer druffgeschdreut.
Dann lesst mer – nur Geduld, ihr Leut! –
des ganze Zeusch mitsamt de Brieh
e Schdundlang odder zwaa dorschzieh.
Die Eier hackt mer dann schee klaa
un gibt se schbeder aach noch draa.
Noch Zugger, Zwiwwel, Senf debei?
Von mir aus. Awwers muss net sei.
Mein Abbedidd is riesegroß:
Jetz gibts Gequellde mit Grie Soß.
Hans W. Wolff